خلف الكواليس

* بقولك ..مات !
- وإيه يعنى..
* هيتهمونى إنى أنا اللى قتلته
- برده وإيه يعنى.
* نعم ! يعنى إيه وإيه يعنى؟
- يعنى إنت عامل مشكلة ليه
* لما أروح فى داهية يبقى مفيش مشكلة..
- يعنى إنت مكنتش عارف أن ده هيحصل!
* إنت بتقول إيه ..أنا كنت بتكلم معاه وإنت اللى ضربته بالرصاص ..ليه ..علشان ترمى التهمة عليا..
- كان فى إيده يرميك فى المستشفى تانى (لما عرف حكايتها) وكان بيهددك إنك لو منشرتش تكذيب على المقالة إللى إنت كتبتها ضده.. يعنى مكناش هناخد منه حاجة غير البهدلة..
* ودلوقتى هو إحنا مش هنتبهدل لما ننسجن ويتعرف كل حاجة..مش هيتقبض عليا .. مش هروح ورا الشمس زي مقال..
- تروح ورا الشمس ..أو أدام الشمس ميهمنيش..أنا اتخنقت منك، تهاجم الفساد ويهددوك وتتراجع وتخاف وترجع تهاجم وتخاف…
* منتا كنت معايا وموافق على كده …ودلوقتى إيه الجديد ..ليه بتعمل كده، مش إنت إللى كنت بتجيبلى بلاويهم وأنا بكتب وافضحهم وبعدين بتقولى اتراجع علشان يدونا فلوس وإلا نرجع نهاجم تانى ونكشف أكتر …إه إللى غيرك؟
- زهقت ..لازم واحد منا بس إللى يكون … يا أنا ..يا إنت ..وبحسبة بسيطة لقيت إنك ملاكش وجود..وأنا خليته يجى النهاردة علشان اقتله وإنت تروح فى داهية… (وعلت صوت ضحكاته الهستيرية….)
* الظاهر إنك نسيت إننا واحد …تقع إنت هقع أنا والعكس…بس عموما أنا فهمت أد إيه كنت غبى وكان لازم أعرف أن الشر مصيره يتقلب على صاحبه… كنت فى صراع من زمان معاك علشان نوقف اللى إحنا بنعمله وخصوصا إن إسمى اتعرف واتشهرت وأتغنيت ومبقيتش لاقى مبرر أضحك بيه على اللى باقى من ضميرى..
- ضميرك ده إللى كان قلقنى وكنت عارف إنك هتتخلص منى باسم ضميرك ..لكن الشاطر هو إللى يسبق وطول عمرى أنا الشاطر وإنت الجبان…إللى بتتكلم وبس..ومش عارف العالم ماشى إزاي …ضميرك ده هو إللى حسم الموضوع من زمان.
على فكرة فى دوشة على السلم ..ده البوليس زمانه هيفتح الباب..
* أيوة ..أنا فهمت خلاص واستوعبت الدرس ودلوقتى لازم اعمل الصح إللى كان لازم يتعمل من زمانه ..وهيوريك إذا كنت جبان وإلا لاء..
- هتعمل إيه يعنى..أنت نكرة أنا اللى كنت بعمل كل حاجة من زمان .ومتقـ…..
(ودوى صوت الرصاص مرة أخرى)
واقتحم البوليس الشقة بعد صوت الرصاصة مباشرة ..ووجد جثتين واحدة لرجل الأعمال المعروف غارقا فى دمه.. والأخرى للكاتب الصحفى الشهير والمسدس بجانب رأسه..